Дзяржаўная ўстанова «Любанскі музей народнай славы»

Любанскі музей народнай славы створаны ў 1968 г. Першая экспазіцыя адкрыта 3 ліпеня 1971 г. У 2003 г. створаны філіял - Музей традыцыйных рамёстваў і промыслаў Любаншчыны. Фонд музея налічвае 25954 адзінкі захавання (на 01.01.2012 г.). Сярод іх касцяныя прылады працы эпохі позняга неаліту, скарб манет Рэчы Паспалітай XVI - пач. XVII стст., творы графікі і скульптуры, выяўленчага, інсітнага і дэкаратыўнага мастацтва, этнаграфічны матэрыял і інш. Музей мае поўны збор паштовых марак Рэспублікі Беларусь выпуску 1992 - 2012 гг.; калекцыі "Фалерыстыка" і "Узнагароды" прадстаўляюць наградную сістэму СССР. Прыярытэтным кірункам дзейнасці музея з'яўляецца работа з дзецьмі. Для рознаўзроставых дзіцячых груп распрацаваны комплекс музейна-адукацыйных праграм і праектаў "Музей+": праграма музейных урокаў "Край над Арэсай"; адукацыйны праект "Як жылі нашы далёкія продкі". Для старэйшых школьнікаў падрыхтаваны адукацыйны праект "Пазыўны "Зыслаў".